pidato adat minang kabau "sombah buka selo1

                                                               SOMBAH BUKAK SELO I

MANYO DATUAK,

KADATUAK SOMBAH SABARIH

MINITAH LAH

SATITIAK AMBUN DARI LANGIK JATUAH KATANAH RANAH MINANG, SOMBAH KADATUAK NAN SABALIK SARATO KITO NAN BASAMO, DARI PANGKA LALU KAUJUANG DARI UJUANG LALU KAPANGKA, NAN DILINGKUANG CUPAK JO GANTANG NAN DIBARI PAHEK BAUKIE, NAN DIUKUA BUEK NAN SASUAI, DIKAMPUANG KATO NAN SA ADAT DINAGARI BALAI NAN SAUNDANG, INDAK DI IBAK DISISIAHKAN INDAK DI INGGO DIBATEHKAN, SABALUN NIEK DISAMPAIKAN SABALUN MUKASUIK DICURAHKAN, ELOK DI SOBUIK NAK SAKETEK, NAN TASERAK KA TANAH DATA TABINCANG KA LUAK AGAM. TARUIH KALUAK LIMO PULUAH, NAN TURUN DI PARIANGAN PADANG PANJANG. TAMASUAK KUBUANG TIGO BALEH.

OSAH NAN LUAK TANAH DATA BABATU BUNGO SATANGKAI, BALIMO KAUM DISINAN BABASA KAAMPEK BALAI, MUDIAK BADATUAK ILIA BATUAN. TUAN KANDI DI PADANG GANTIANG, TUAN GADANG DI BATIPUAH,TUAN TITAH DISUNGAI TARAP INDOMO DI SARUASO,DATUAK MANGKUDUN DI SUMANIAK, RAJO ADAT DI LINTAU BUO, RAJO IBADAT DI SUMPUR KUDUS, RAJO ALAM DIMINANGKABAU ITU NAN RAJO TIGO SELO, BAGALA RAJO KABANARAN. ALAH BAKAIN SI GONDANG–GONDANG, WARNANYO SIPURAN – PURAN, DEK UNTUANG TAKADIA ALLOH, UNTUANG SUDAH MASO ITU. DIKAMBANG SALEBAR ALAM DIPALUN SAPALUN KUKU NAMONYO TANUN SASENTAK, SENTAKNYO SAKALI SATAHUN SUDAHNYO SAETO SAHARI, DIMULAI KADALAM LAUIK BATANUN KADALAM AIE, SUDAH NYO KADALAM API BATURAH KABULAN PANUAH, BASIKOCI KAMATOARI BAKUNCAI KABINTANG TIMUA, IYO LAH KAIN KABESARAN NAK SATIMBANG JO NAGARI SABAB IYO DEK BAITU, INDAK KUSUIK DEK BAPAKAI INDAK BASAH KANAI AIE, INDAK LAH ANGUIH KOK TAPANGGANG, KOK DICALIAK KABANTUAKNYO LIHIANYO INTAN BATATA, SIBAHNYO INTAN SOMURUIK, BAKAHNYO AMEH MANIKAM BANANGNYO SUTO DUO ANGGO GUNTIANGNYO ALA WU’ALAM, DIJAIK SUTAN DIACEH DIGUNTIANG SUTAN DIPADANG, SAPULUAH MASIN PANJAIK SABALEH JAIK TATIKAM.

HERU GUMERU TAPI KAIN HELANG GUMELANG CAHAYO NYO NAN CO CINCIN PUSAKO LAMO, SAMO TURUN KAGALOGA SAMO NAIEK JO GALOMBANG SAMO TIMBUAH JO GULAKAN.

SATO TIMBUAHNYO BACAHAYO SAMPAI KALANGIK NYO MAMBAYANG NAN BANAMO SIMODANG GIRIEK ROTAK 1200 SUMBIANG 120 BALILIK JO AKA BAHA, BAROKEK JO GOTAH PEONG NAN BASAWUANG JO GOTAH POMAT TAREH MULIA TIGO PUCUAK NAN SAPUCUAK JATUAH KABUMI NAN SAPUCUAK SURUIK KA ASA NYO KOK TASINTUAH NYO MARUNGUIK KOK TASENTAK NYO MARINGIK, ITU WARISAN NAN KIRAMAT NAN BATOMPEK DIBUKIK SIGUNTANG-GUNTANG, LAUIK BANAMO LAUIK ASIN PULAU BANAMO LANGKA PURI TALUAK BANAMO PINANG LUNGKAI SUMU BANAMO GANTUANG TILAM SUNGAI BANAMO SUNGAI AMEH DIDALAM LURAH SITUKAH BANANG TUMBUAH LAH BUNGO AMBUN SURI SATO TUMBUAH NYO BABUAH DALAM BUNGO PULO, TUMBUAH NAN BAK SARUPO IKO KINI, DEK AIE LAH BASENTAK SUSUIK OMBAK ALAH BARALUN JAUOH, ILIRAN SUNGAI LAH AMBO TURUIK PANDANGAN LAH SUDAH KAMUARO KOK JANIAH SAMO JO AMBUN TAGANTUANG PUTIAH LAH SAMO JO KAPE DI CABIAK DEK KARUAK LA SAHABI GAWUANG AWAI PUN ALA SAHABI RASO, NIEK JO NASAR NAN LA SAMPAI IKARAH MULIA LA BAUNI UMPAMO LA SALAMAT SAMPORONO, TANDO LASAMAT SAMPORONO ASOK KUMAYAN LA BAKOBUN DO’A TUANGKU LA BATANGKAN, HANCUA SIRIEH MANJADI SOPAH KALEK LATIBO DIRANGKUNGAN SIRAH NYO TAMPAK DIBIBIA, PARISO MARUANG TUBUAH SEHAT ANGGOTA KATUJUAHNYO.

PIHAK DIADAT SAWAJAH IKO KINI KARAJO LA SUDAH KITO KAKOK ADAT LA TIBO DILANGGAMNYO TUAH KARAJO LAH MANJADI NIEK SAMPAI DUNIE LAH LANGSUANG AWA JO AKHIR LA SANTOSO CURAI PAPARAN KATO ADAT LA BABAGAI BUAH RUNDINGAN AWA DIRUNUIK KAPAMULAI TAGA DEK KILAF JO KILAPAT KOK BATAMU LILIK JO SUMBIANG KOK RATAK TALONG LAH SIMPAI HINGGO IKO SOMBAH DIGAMAK KATO SUDAH RUNDIANG BARANTI KATOGAK SOMBAH DIANJUANG KA DUDUAK AMPUN JO MAAF AMBO PINTAK.

( 1 )

SOMBAH TASERAK KANAN RAMI SALAM KAPADO NAN BASAMO, AWA DIKANA TANTANG IKO AKHIA DISABUIK NIEK JO NASAR NAN TANIEK NAN TANASAR DEK KAMI SAGALO ALEK NAN DATANG, KOK DUDUAK NAK MAURAK SELO TOGAK NAK MAMBUANG LANGKAH NAK TURUN DITANGGO RUMAH IKO, NAK ISIN DEK SILANG NAN BAPANGKA KARAJO NAN BAPOKOK.

SAKIAN SOMBAH BAKEH DATUAK.

( 2 )

PIHAK KABADAN DIRI AMBO BAK UMPAMO BURUANG PIPIK TABANG BABEGA DI UDARO, NAN BALUNTA-LUNTA JO KABUIK NAN BA BENTAN-BENTAN JO AWAN, PUEH MALAYANG JO MALAYOK SUDAH MANINGGINYO MARANDAH TABANG KARIMBO NAN SATUMPAK IYO KAPADANG RIBU-RIBU, LA TIBONYO DISINAN SADANG MAMAKAN BUNGO RUMPUIK LITAK LAPEH AUIH PUN TIBO LALU DISOSOK AMBUN NAN SATITIAK SAJUAK NAN BUKAN ALANG-KAPALANG BAK PANEH DITIMPO RINYAI, MAMBAYANG-BAYANG LALU KAMUKO MANCAYO KAUTAK BANAK, SANANG HATI BUKAN KAPALANG PARISO MARUANG TUBUAH SAJUAK ANGGOTO KATUJUAHNYO,

DEK LA SUDAH MINUM JO MAKAN MUKASUIK BANA DALAM HATI NAK MANURUIK PINANG NAN SABATANG MALIEK SARANG BATINGGAKAN PULANG KA ASA DAULUNYO, KOK TAGANANG ALA BAPAMATANG KOK MAILIE ALA KAMUARO KARONO NAN DIMUKASUIK ALA SAMPAI NAN DIAMA ALA PACAH NAN DICINTO ALA DAPEK,

KOK DUDUAK LA NAK MAURAK SELO TOGAK LA NAK MA AYUNKAN LANGKAH BAGANJUA SURUIK KAPANGKALAN SABONDONG PULANG KANAGARI, MOHON DILAPE JO HATI NAN SUCI JO MUKO NAN JANIAH, SAGITU SOMBAH BAKEH DATUAK.

Posted in: pidato